जाजरकोट अस्पतालमा शुरु भयो शल्यक्रिया सेवा

जाजरकोट अस्पतालमा आकस्मिक प्रसूति शल्यक्रिया सेवा शुरु भएको छ । जिल्ला अस्पताल ५० श्याको भए पनि विशेषज्ञ चिकित्सकको अभावमा शल्यक्रिया जिल्ला बाहिर गरिँदै आएको थियो ।
अस्पतालमा डाक्टर महेश सिलवाल आएपछि शल्यक्रिया सेवा सुचारु गरिएको अस्पतालका प्रमुख डा राजेन्द्र लामाले जानकारी दिनुभयो । गतवर्ष कर्णाली स्वास्थ्य विज्ञान प्रतिष्ठान जुम्लाबाट काजमा आएका चिकित्सकले केही सामान्य शल्यक्रियाका काम गरे पनि काज सकेर फर्केपछि प्रसूति सेवा बन्द भएको थियो । वन तथा वातावरणमन्त्री शक्तिबहादुर बस्नेतको लामो प्रयास, नगरप्रमुख चन्द्रप्रकाश घर्तीको निरन्तरताको प्रयासबाट जिल्लामा चिकित्सक आएपछि जिल्ला अस्पतालमा नै शल्यक्रिया सम्भव भएको अस्पताल विकास समितिका अध्यक्ष धर्मशीला बस्नेतले बताउनुभयो ।
अस्पतालमा शुक्रबारदेखि आइतबारसम्म चार जनाको सफल प्रसूति सेवा र एकजना भेरी नगरपालिका–४ की प्रमिला चन्दको शल्यक्रिया गरेर बच्चा निकालिएको डा भुपेन्द्र मल्लले जानकारी दिनुभयो । चन्दको शल्यक्रियामा डा सिलवालको नेतृत्वमा, डा मल्ल, डा केशरजङ्ग कार्की, डा अमन रञ्जीत, नर्स विद्या खत्री लगायत संलग्न हुनुहुन्थ्यो ।
अस्पतालमा दैनिक दुई जनासम्म आकस्मिक प्रसूति शल्यक्रिया गर्न सकिने क्षमता भएको डा। मल्लले जानकारी दिनुभयो । सञ्चालनमा आएको आकस्मिक प्रसूति सेवा निःशुल्क प्रदान हुने अस्पतालले जनाएको छ । सरकारले प्रसूति सेवा निःशुल्क गरेको छ । आइतबार साँझ बारेकोट गाउँपालिकाकी तीर्थ शाहीको एपेन्डसाइटको शल्यक्रियासमेत गरेको डा मल्लले जानकारी दिनुभयो ।
अति जटिल बाहेक सबै प्रकारका शल्यक्रिया सेवा अस्पतालबाटै दिन सकिने भएको उहाँले बताउनुभयो । अब बिरामीलाई सामान्य खालका शल्यक्रियाका लागि पनि चौरजहारी, नेपालगञ्ज जानुनपर्ने उहाँको भनाइ छ ।भेरी नगरपालिकाका प्रमुख चन्द्रप्रकाश घर्तीले नगरपालिकाबाट हुने सम्पूर्ण पहल गर्न तयार भएको बताउनुभयो । जिल्लामै गुणस्तरीय सेवा दिनसक्ने भरपर्दो अस्पताल बनाउन आफ्नो भरपुर प्रयास रहने उहाँले बताउनुभयो । अब शल्यक्रियाकै लागि नेपालगञ्ज र काठमाडौँ जानु नपर्ने डाक्टर मल्लले बताउनुभयो ।
जिल्ला अस्पतालमा सेवा प्रवाह सहज बनाउन नगरपालिकाले शववाहन उपलब्ध गराउने नगरप्रमुख घर्तीले बताउनुभयो । शल्यक्रियादेखि अन्य काम गर्न भौतिक संरचनाको अभाव हुँदा काम गर्न समस्या भएको अस्पताल प्रशासनले जनाएको छ । निर्माण व्यवसायीले प्रसूति गृहको भवन निर्माण नगर्दा दैनिक सेवा प्रवाहमा समस्या भएको हो । जाजरकोटका सबै स्थानीय तहले पनि आफ्ना मातहतमा रहेका स्वास्थ्य संस्थालाई सक्रिय बनाई दैनिक कामकाजमा सहजता बनाएको बताएका छन् । जनताको जनजीवनसँग जोडिएको स्वास्थ्य जस्तो संवेदशील विषयका लागि आफूहरुले कुनै कसर बाँकी नराख्ने नलगाड नगरपालिकाका नगर प्रमुख टेकबहादुर रावलले बताउनुभयो ।
रासस